Cead/stampaí inimirce

Más rud é go bhfuil tú ag teacht go hÉirinn ó lasmuigh den Aontas Eorpach agus den Eilvéis, agus gur mian leat fanacht níos faide ná 90 lá, ní foláir duit iarratas a dhéanamh chuig Seachadadh Seirbhíse Inimirce ar chead.

Beidh an cead sin ag teastáil uait chun bheith ag obair, dul i mbun staidéir, cónaí nó bheith in éineacht le duine de do theaghlach in Éirinn. Léigh thíos, le do thoil, chun eolas a fháil faoi na cineálacha éagsúla ceada atá ann.

Léirítear gach cineál ceada le huimhir stampa – mar shampla, stampa 1, stampa 2, stampa 3. Leis an gcineál stampa a fhaigheann tú i do phas agus a luaitear ar do chárta Ceada Cónaithe Éireannaigh, cuirtear in iúl duit cad is féidir leat a dhéanamh agus cá fhad is féidir leat fanacht in Éirinn. Tabhair do d’aire, le do thoil, go bhféadfaidh sé nach ndéanfar ceadanna áirithe a thaifeadadh i do phas. Léigh thíos, le do thoil, chun tuilleadh eolais a fháil.

Nuair a bheidh cead agat fanacht in Éirinn ní mór duit é a chlárú le húdaráis inimirce na hÉireann, ar a dtugtar Seachadadh Seirbhíse Inimirce (ISD) laistigh de 90 lá. Mura féidir leat coinne a fháil laistigh den tréimhse seo ná bíodh imní ort, mar ní chuirfimid do chead ar ceal ná ní bheifimid ag súil go bhfágfaidh tú an tír fad atá tú ag fanacht le clárú. Tabhair faoi deara, áfach, go gcaithfidh tú a bheith in ann a thaispeáint gur lorg tú coinne laistigh den tréimhse 90 lá seo agus go bhfuil iarracht déanta agat clárú chomh luath agus is féidir. Féadfar diúltú do dhuine atá ag iarraidh clárú thar thréimhse ama réasúnach agus go n-eiseofar é nó í ag iarraidh fógra ionnarbtha.

Cláraíonn ISD ceadanna den chéad uair ag Cé an Bhuirg i mBaile Átha Cliath. Déanfar iarratas ar líne ar gach athnuachan cead laistigh de Phoblacht na hÉireann ina dhiaidh sin. Nuair a chláraíonn tú go rathúil gheobhaidh tú cárta Cead Cónaithe Éireann (IRP) tríd an bpost ag an seoladh a thug tú don ISD. Ní cárta aitheantais é cárta IRP ach is doiciméad tábhachtach é a chruthaíonn go bhfuil tú i do chónaí go dleathach in Éirinn. Ba chóir duit é a iompar leat i gcónaí agus é a thabhairt ar aird do na húdaráis má iarrtar ort.

Má bhíonn an rath ar chlárú do cheada chun fanacht in Éirinn, féadfaidh sé go stampálfaidh Oifigeach Inimirce do phas, ag brath ar imthosca do chlárúcháin.

Tabhair do d’aire, le do thoil, go ndeonaítear roinnt ceadanna gan do phas a bheith stampáilte.

Mar shampla, le Stampa 2 nó 2A, déantar cead chun dul i mbun staidéir le haghaidh céime in Éirinn (chomh maith le cineálacha eile staidéir) a chur in iúl. Ní foláir eolas a bheith agat ar do stampa agus ar na coinníollacha a bhfuil feidhm acu maidir leis. Má sháraíonn tú na coinníollacha sin, féadfaidh sé nach n-athnuafar do chead agus beidh ort an tír a fhágáil, nó féadfaidh sé go n-eiseofar fógra chugat á rá go bhfuiltear chun tú a dhíbirt.

Féadtar an t-am a charnann tú ar stampaí áirithe a úsáid chun d'áit chónaithe ináirithe a ríomh (faoi réir coinníollacha) má dhéanann tú iarratas ar shaoránacht trí eadóirseacht. Tá na coinníollacha a ghabhann le gach stampa leagtha amach thíos.

Chun eolas a fháil faoi stampaí agus cead atá bunaithe ar Chearta Conartha an AE, léigh an leathanach dar teideal Cearta Conartha an AE, le do thoil.